Resumen de prensa
Históricu sindicalista de la transición n'Asturies
Comisiones Obreres fai alcordanza de Juan Muñiz Zapico nos 30 años de la so muerte
3 de enero de 2007 - Asturies.com

Redacción

El sindicatu Comisiones Obreres tien preparaos pa esti xueves 4 de xineru una riestra d'actos n'alcordanza del históricu sindicalista asturianu Juan Muñiz Zapico, una de les figures más simbóliques de la transición n'Asturies, del que se cumplen 30 años de la so muerte nun acidente de tráficu. "Xuanin el de Mieres" yera l'únicu asturianu encausáu nel famosu "procesu 1001" que sentó, cuando la dictadura franquista yá taba dando les boquiaes, a un garapiellu de sindicalistes nel escañu de los acusaos. La dictadura pidía castigos descomanaos pa ellos, y en concreto, solicitaba 18 años de cárcele pa Muñiz Zapico, que dempués quedaron en cuatro. El sindicalista asturianu ye tamién una figura importante na historia del sindicatu Comisiones Obreres, el más importante n'Asturies hasta los años 70 y del que foi ún de los sos fundadores. El 2 de xineru del 77, un accidente de coche acabó cola vida d'un de los sindicalistes más importantes na historia d'Asturies. El so intierru na Frecha (L.lena) al que foron miles de persones, convirtiose nun actu qu'amás del duelu tenía un fuerte calter políticu.

Los actos previstos pola Fundación que lleva'l nome del sindicalista van entamar el 4 de xineru con un actu institucional nel cementeriu de La Frecha, en conceyu de L.lena, a partir de les 12,00 nel que van participar, amás de familiares de Muñiz Zapico, el Presidente de la Fundación Francisco Prado Alberdi, el Presidente asturianu Vicente Álvarez Areces, l'alcalde de L.lena Hugo Moran, la secretaria Xeneral del PCA Noemí Martín, y Antonio Pino y Jose Maria Fidalgo en representación de CC.OO. El grupu musical "Nuberu" va echar el piesllu musical al actu, pa siguir a partir de les 13,30 hores nel Salón d'Actos de la Casa de la Música de Mieres, cola proyección d'un documental sobre la transición n'Asturies.

Patrocina: Consejería de Cultura, Comunicación Social y Turismo. Obra Social y Cultural CajAstur. Fundación Rosa Luxemburgo.
 
Colabora: Ayuntamiento de lena. Ayuntamiento de Mieres. Ayuntamiento de Langreo. Ayuntamiento de Oviedo. Ayuntamiento de Avilés. Ayuntamiento de Cangas de Narcea. Ayuntamiento de Gijón. Red de Archivos de CC.OO. Fundación 1 de Mayo.
Fundación Juan Muñiz Zapico