Resumen de prensa
L'aniversariu de la muerte de «Juanín» rinde homenaxe a los encausaos nel procesu 1001
10 de xunu 2007 - Les Noticies

Un acto nel Teatru Xovellanos de Xixón va recordar a los sindicalistes deteníos en 1972 xunto a Juan Muñiz Zapico, líder de CC OO d'Asturies

Vanessa Gutiérrez

Actu de presentación de la biografía titulada «Juan Muñiz Zapico. Juanín».
El 24 de xunu de 1972, la policía entraba nel conventu de los padres Oblatos en Pozuelo d'Alarcón onde se taba reuniendo la Coordinadora Xeneral de Comisiones Obreres y detenía a diez sindicalistes que trabayaben nun documentu tituláu «Sobre la unidad del movimiento de masas». Empezaba entóncenes un caso conocíu como'l «Procesu 1.001», contra'l que se producieron un sinfin d'acciones y manifestaciones cola fin de dar a conocer la so naturaleza represiva. Ente los deteníos figuraba Juan Muñiz Zapico, conocíu como «l'asturianu» ente los presos y como «Juanín» dientro de CC OO d'Asturies; un líder sindical de reconocida trayectoria que, hai agora trenta años, morría nun desgraciáu accidente de tráficu'l 2 de xineru de 1977.

Dende aviento del año pasáu, coincidiendo col aniversario de la so muerte, la Fundación Juan Muñiz Zapico de CC OO d'Asturies vien recordando la figura d'esti sindicalista, a lo llargo d'una serie d'actividaes, ente les que s'encuentra una exposición itinerante qu'anguaño, y hasta'l día 17, va tar colgada na Sala d'Exposiciones del Centro de Cultura Antiguu Institutu Xovellanos de Xixón. Nesi espacio, el sábado 9, va haber una recepción a tolos compañeros encausaos nel «Procesu 1.001», asina como los sos familiares y abogaos defensores, que tamién van ser homenaxeaos nun actu que se va celebrar el domingu 10, a les 12 hores, nel Teatro Xovellanos de Xixón.

Al honre de la Unidá

La Fundación que lleva'l nome de quien Manuel Asur retrató nun poema como «l'home de la Unidá», va ciarrar les actividaes con motivu del trenta aniversariu n'Asturies con un homenaxe a los compañeros sindicalistes que foron deteníos y xulgaos nel procesu popularmente conocíu como «1.001» y que tuvo amplia trescendencia intemacional pol so carácter represivu.

Nel actu que se va celebrar nel Teatru Xovellanos de Xixón y que va tar presentáu por Eladio de Pablo, van intervenir el presidente de la Fundación Juan Muñiz Zapico, Francisco Prado Alberdi, l'alcaldesa de Xixón, Paz Fernández Felgueroso, el presidente en funciones del Gobiernu d'Asturies, Vicente Álvarez Aréces, el secretariu xeneral de CC OO d'Asturies, Antonio Pino, y el secretariu xeneral de Confederación d'esti sindicatu, José María Fidalgo. Xunto a ellos tamién va participar la familia de «Juanín»: Genita Torre, Marcos y Yolanda Muñiz, al pie de Manolo López, abogáu del sindicalista asturiano énte'l Tribunal d'Orde Públicu que lu encausó. Los sindicalistes Eduardo Saborido, Nicolás Sartorius, Fernando Soto, Francisco Acosta, Miguel Ángel Zamora y Pedro Santiesteban, procesaos xunto a «Juanín» y los abogaos Jaime Sartorius y Francisca Sauquillo, tamién van tar presente non homenaxe que quier ser recuerdu y homenaxe de los que significaron la conquista de les llibertaes nel final de la dictadura franquista. Finalmente, el pieslle al actu del domingo va ponelu'l grupo asturianu Nuberu, quien va interpretar pa la ocasión «Depués pasaron trenta años».

Recuerdu a una vida

Dientro de los actos del trenta aniversariu de la muerte de Juan Muñiz Zapico, la Fundación venceyada a CC OO d'Asturies presentó'l día 30 de mayo una biografía ellaborada polos profesores Rubén Vega y Carlos Gordon, que cuenta col prólogu de Josep Fontana. La edición que lleva por títulu «Juan Muñiz Zapico. Juanín», cuenta con una selección de semeyes y documentos anexos firmaos por persones de la relevancia de Marcelino Camacho, Gerardo Iglesias, Horacio Fernández Inguanzo y Ramón Fernández Rañada, que sirven d'apoyu al recorríu argumental al que se suma l'aportación en primera persona escrita por dalgunos de los protagonistes del llibru. Na obra, dalgunos compañeros de «Juanín» como Francisco Prado Alberdi, Nicolás Sartorius, Vicente Álvarez Areces, Luís Felipe Capellín, Manuel García Fonseca y Pedro Alberto Marcos repasen les sos vivencies de llucha. Como epílogo, Marcos Muñiz, fíu de «Juanín», aporta un relatu que lleva por títulu «El güelu de Xandro».

Patrocina: Consejería de Cultura, Comunicación Social y Turismo. Obra Social y Cultural CajAstur. Fundación Rosa Luxemburgo.
 
Colabora: Ayuntamiento de lena. Ayuntamiento de Mieres. Ayuntamiento de Langreo. Ayuntamiento de Oviedo. Ayuntamiento de Avilés. Ayuntamiento de Cangas de Narcea. Ayuntamiento de Gijón. Red de Archivos de CC.OO. Fundación 1º de Mayo.
© Fundación Juan Muñiz Zapico