Resumen de prensa
La victoria del sindicalismu frente a la represión franquista nel «Procesu 1001»
17 de xunu de 2007 - Les Noticies

Cúmplense 35 años del xuiciu qu'encarceló a la Coordinadora de CC OO

Vanessa Gutiérrez

Portada d'un boletín del Centro d'Información y de Solidaridá con España.
El 24 de xunu de 1972, la policía entraba nel conventu de los padres Oblatos en Pozuelo d'Alarcón, en Madrid, deteniendo a parte de lo que yera la dirección del movimientu socio-político a nivel estatal. Ellí taba'l sindicalista asturianu Juan Muñiz Zapico, conocíu como «juanín», y con él cai tamién el dirixente comunista Marcelino Camacho; el teóricu de Comisiones Nicolás Sartorius; el sacerdote Francisco García Salve; los sevillanos Fernando Soto, Francisco Acosta y Eduardo Saborido; el madrileñu Miguel Ángel Zamora; el vallisoletanu Luis Fernández Costilla y el vizcaín Pedro Santiesteban. Dende'l conventu, imnediatamente son llevaos a la Dirección Xeneral de Seguridá, na Puerta'l Sol, onde los espera'l comisariu Yagüe, xefe de la Brigada Político-Social: ensin dubia, l'apresamientu de la Coordinadora Xeneral de Comisiones Obrares yera un trunfu naquella España franquista que trató de defender la so agonía escarmando y asustando a la oposición encarnada nel movimientu obreru al traviés de los sos representantes. Empezaba asina'l xuiciu popularmente conocíu como Procesu 1001, por ser ésti'l númberu d'expedientes de presos políticos que constaben nel Tribunal d'Orde Ptíblicu hasta la fecha y porque, al denominalu d'esta manera, facíase cincapié no colectivo d'un movimientu unitariu, nacíu del mesmu senu de la clas trabayadora que'l réxime dictatorial trataba de condenar con él.

Cuestionamiento del réxime

La biografia de Juan Muñiz Zapico ellaborada polos historiadores Rubén Vega y Carlos Gordon pa la fundación que llela'l nome del líder obreru de La Frecha (Llena), recuerda, cuando se cumplen trenta y cinco años d'esti casu, el que foi un procesu políticu que, dende la defensa de los sindicalistes, enxuició al propiu réxime de Franco presentando les contradicciones, l'arbitrariedá de la so lexislación y la so actuación represiva. La estratexa xudicial siguida polos presos del 1001 centróse en dos aspectos: per una parte, contó cola axitación popular, de la que s'esperaba qu'ayudare a xulgar a los xulgadores. Al tiempu, la elección de los abogaos defensores tamién se convirtió nuna cuestión política d'importancia, decidiéndose, nesi sen, qu'hubiere abogaos de tol arcu políticu, incluyida la derecha, pa conformar n'España, como comenta Saborido, «les fuerces democrátiques que diben sustituyir al franquismu».

Manifestación en París en solidaridá cotos encausaos nel «Procesu 1001».
Les protestes y muestres de solidaridá colos sindicalistes del 1001 non se fixeron esperar y artistes como Yves Montad, Alan Stivell, Mikis Theodorakis, Georges Moustaki, Arthur Miller, Noan Chomsky o Pete Seeger sumáronse a les piticiones d'amnistía que, per otra parte, reclamaben miles de trabayadores con paros y movilizaciones dientro y fuera del Estáu. Sin embargo, de poco valieron al final estos apoyos, yá que, el mesmu día nel que se celebraba'l xuiciu a los sindicalistes, la banda terrorista ETA asesinaba a Carrero Blanco, quien taba llamáu a suceder al xeneral Franco na cabeza de la dictadura. El clima de tensión yera evidente. Asina, contaba Marcelino Camacho nuna entrevista fecha pol periodista Lupercio González el mieu que pasó esi día mentes taben apuntando a la so compañera con una pistola los grupos de los Guerrilleros de Cristo Rei, que sentaben nos banquillos del xuiciu, tres de los procesaos. Mentestanto, na cai pordíen escuchase glayíos que clamaben: «Taracón, al paredón; Ruíz Jiménez y Camacho, a la horca». Los déss 28 y 29 d'avientu lleéronse unes condenes que l'atentáu contra Carrero decidiere penriba d'otres presiones: 20 años pa Camacho y Saborido; 19 pa García Salve y Sartorius; 18 pa «Juarnín>; 17 a Soto; y 12 pa Santiesteban, Acosta, Zamora y Costilla.

Con too y con ello, «nunca llovió que nun aparara», como avezaba a dicir «Juanín» a los amigos y familiares que lu visitaban na cárcel de Carabanchel, y el 15 de febrero de 1975 el Tribunal Supremu dictó sentencia sobre'l recurso de los sindicalistes condenándolos por delito d'asociación ilícita, anque ensin el calificativu de dirixentes, de manera que nel caso del asturianu del 1001, la pena pasó a ser de 18 a 4 años de condena. Finalmente, el 30 de payares de 1975, malapenes dos meses depués de cinco execuciones más del réxime y diez díes depués de la muerte de quien les sancionó, llega un Real Decreto que-yos vuelve definitivamente la llibertá. Pero l'anmistía y el propósitu unitariu de les sos inquietúes siguieron siendo l'oxeticu principal de les vides de diez sindicalistes qu'a día de güei siguen reivindicando, col so llabor y cola so memoria, unes conquistes imprescindibles pa la clas trabayadora.

 

Vega: «El mieu ye un gas paralizante que tien efectos na sociedá a mui llargu plazu»
17 de xunu de 2007 - Les Noticies

Entrevista a Rubén Vega, profesor d'Historia Contemporánea na Universidá d'Uviéu

Vanessa Gutiérrez

Rubén Vega, profesor d'Historia Contemporánea y autor de la biografía «Juan Muñiz Zapico. Juanín» (KRK) xunto con Carlos Gordon, reflexona a traviés del averamientu a la vida de sindicalista de CC OO -convertíu cuasi nun mitu pola historia-, sobre la necesidá de mirar p'atrás énte sucesos que marquen decisivamente a una comunidá: «Nun hai sociedá que pasare una experiencia traumática de represión sangrienta que más tarde o más temprano nun tenga que volver la vista p'axustar cuentes col pasáu», afirma. Nesti sen, en referencia al tiempu nel que'l réxime franquista quixo proyectar una imaxe de «dictablanda», l'historiador comenta cómo la «inversión» en muerte na que se sofitó'l golpe d'Estáu fixo que quedara grabada la llección: «La sociedá sabía que podíen matar y el mieu ye un gas paralizante que tien efectos a mui llargu plazu».

Entrando nel momentu actual, nel que s'asoceden les iniciatives pola recuperación de la memoria histórica y ta en trámites nel Congresu una llei qu'aborda esta materia, Rubén Vega apunta qu'ésti «ye un procesu d'axuste de cuentes col pasáu que tresciende con muncho lo que los políticos son quien a facer». Con too y con eso, asegura que «yá prescribió'l pactu de silenciu» que se robló na Transición. L'historiador considera que'l pasu a la democracia xestionóse d'una manera mui cuestionable dende'l puntu de vista éticu: «Tratóse por igual a les víctimes qu'a los verdugos y lo que tuvieron que facer les victimes foi callar», remembra.

-Acaba d'espublizar, xunto a Carlos Gordon, una biografía de Juan Muñiz Zapico, el que fuere líder de CC OO n'Asturies. ¿Qué foi lo que más lu sorprendió del personaxe?

-Lo que más me sorprendió foi confirmar la imaxe tópica qu'había de «Juanín». Ye sabío que tol mundu fala bien de los muertos y ésti ye ún d'estos casos, col aquel de que n'Asttuies, dientro del movimientu obreru y especialmente na organización de CC OO, Muñiz Zapico convirtióse nun mitu. Y, dende hai munchos años, entrevistando a xente comprobé que tol mundu fála bien de Juanín, ensin señalar nada crítico d'él. Instintivamente esto produzme cierta desconfianza porque naide puede ser tan bonu nin tan perfectu; cuando te metes nel personaxe ye verdá que descubres que yera humanu y que tenía les sos debilidaes, pero tamién ves qu'esi retratu favorable que fain d'él ye bastante ciertu. Tol mundu destaca les mesmes virtúes: el carácter optimista y la capacidá que tenía pa integrar conciliadoramente a tol mundu. Efectivamente, de dalguna manera'l personaxe parezse abondo al relatu míticu que se construyó sobre él.

-Nel llibru analizase'l «Procesu 1001», onde foi condenáu con otros 9 dirixentes sindicales: un xuiciu onde, per una parte, foi castigáu tol movimientu obreru, pero onde tamién foi enxuiciáu'l réxime franquista.

«Procesar a la cúpula de CC OO suponía intentar acabar col movimientu obrero».
-Sí. En contextos de dictadura ocasionalmente los fenómenos de represión pueden volvese na so contra o pueden tener un efectu rebote. Tocante a esto, hai un casu emblemáticu como ye la defensa que Fidel Castro fixo depués del asaltu al cuartel de Moncada cuando dixo aquello de «la historia me absolverá». Como ési hai otros casos nos que se trata de volver el procesu en contra de los represores. Nel franquismu hubo tres grandes xuicios que xueguen esi papel revelador del rostru más impresentable de la dictadura: ún ye'l procesu y la execución de Julián Grimau, que llogra una gran movilización internacional porque xulgaben a una persona por supuestos crímenes de guerra 24 años depués de qu'eso pasare y cuando al añu siguiente'l réxime celebraba 25 años de paz. Otru ye'l Procesu de Burgos contra militantes d'ETA. Y el terceru ye, ensin dubia, el «Procesu 1001». Esti último, al xulgar a una parte de núcleo de dirección de CC OO en toa España, na que tán dirixentes con una gran autoridá moral sobre'l sindicatu, conviértese non procesu contra tol movimientu obreru que ta representando un desafíu a la dictadura y que ta enanchando los derechos y llibertaes de los ciudadanos. Y amás conviértese nuna clamorosa denuncia énte la opinión pública internacional de la naturaleza d'esti casu. Cuando el Tribunal d'Orde Públicu pide pa estos sindicalistes, por una militancia puramente sindical que consistía en reunise, facer fuelga, expresase, y asociase, penes d'hasta 20 años de cárcel, hai una campaña de solidaridá mui potente sobre too en toa Europa. Por poner un exemplu: l'ex fiscal xeneral de los EE UU Ramsey Clark asiste al xuiciu d'estos sindicalistes y un mes más tarde de producise la condena publica un artículu nel New York Times que se titula «Nun hai xusticia colos trabayadores n'España». A Juanín, por dicir, caen-y 18 años por nun tener fecho nada. Nesi sen, el procesu vuélvese contra sí mesmu y cola campaña que s'articula de solidaridá y de protestes vuélvese contra la dictadura. Hai episodios represivos que demuestren la naturaleza d'un réxime. Nesi momentu, el franquismu quería proyectar, y facíalo con cierto éxitu, la imaxe de «dictablanda» pa llavase la cara: la xente yá come a diario, vívese meyor, hai hasta quien gasta coche... Amás, tenía la ventaya de tener matao muncho en primeres, qu'esa inversión de mieu fixo que depués yá nun necesitare matar tanto: la sociedá sabía que podíen asesinar y el mieu ye un gas paralizante que tien efectos a mui llargu plazu. La xente que viviere aquella represión difícilmente diba desafiar a la dictadura y por eso ella puede pemitise querer camudar de cara. Pero hai episodios como estos nos que'l franquismu, cuando siente desafiáu, ponse nerviosu y respuende con represión, que ye la única forma na que lo sabe facer. Y el movimientu obreru nesos años taba desestabilizando muncho al réxime. Nun hai más que seguir la secuencia de los últimos años: la policía siguía matando obreros de contino nos últimos años de dictadura porque taben perdiendo'l control de la cai. Por eso procesar a la cúpula de CC OO suponía intentar desarticular un movimientu que se taba ramificando nesi momentu.

-Nesti añu, declaráu de la Memoria Histórica, salen munches voces de protesta contra una transición de la que se diz que foi exemplar pero que tachen de ser «un regalu del dictador». Nesi sen, critícase la Llei de la Memoria Histórica por ciarrar en falso un periodu de la historia d'España ensin entrar nel análisis rigurosu de lo que pasó. ¿A usté qué opinión-y merez? ¿Puede en verdá lexislase la memoria colectiva?

-El poder de les lleis ta esaxeráu porque los lexisladores nun tienen la capacidá, por suerte, de ciarrar nada. Ésti ye un procesu d'axuste de cuentes col pasáu que tresciende con muncho lo que los políticos son quien a facer. Ye un fenómenu social y sociolóxicu mui ampliu nel que los políticos simplemente intenten bandease ente presiones mui contradictories, porque hai un sector mui ampliu de la sociedá que nun quixere que nos alcordáremos d'estos asuntos, y otra parte que ve dafechu insuficiente cualquier midida. Si tenemos una percepción un poco más amplia, nun hai sociedá que viviere una experiencia traumática de represión sangrienta que tarde o temprano nun tenga que volver la vista al pasáu p'axustar cuentes con él. Y eso pasa inclusive al cabu de sieglos: pasa cola esclavitú, planteándose agora indemnizaciones a los descendientes de sexta xeneración de los que foron esclavos, por exemplu. Pasa col apartheid en Sudáfrica, en toles dictadures de Sudamérica y inclusive con semidictadures, como en México cola represión del 68. Francia, per otra parte, ta axustando cuentes col collaboracionismu: Sarkozy acaba de reivindicar a un dirixente comunista... Ye imposible nun mirar atrás: los humanos somos lo que somos porque fomos lo que fomos. Los políticos depués intenten lexislar, porque tamién ye un problema politicu. Pero va más allá. Equí, depués de munchu tiempu siendo un tabú, ta lexislándose.

«La transición española trató igual a les víctimes qu'a los sos verdugos».
La transición intentó olvidar esi asuntu; yera un tema políticamente incorrectu. Y eso podrá ser más o menos discutible, o más o menos posible nesi momentu. Nós nun nos podemos comparar con Alemania porque equí la dictadura dio pasu a una democracia onde siguió gobernando'l personal que venía del réxime. Agora que se ta conmemorando a Adolfo Suárez, a quien yo tengo n'abonda bona estima como dirixente, lo cierto ye que'l so pasáu yera estrictamente franquista. Nun tenía nin el menor antecedente democráticu cuando foi nomáu presidente del Gobiernu: nun fixere nin un comentariu en privao que nos diere a entender que yera demócrata. En cambiu fuere gobernador civil y otra serie de cargos políticos. Esi modelu de transición tenía un preciu: el num lu tocar. Y eso truxo una consecuencia mui grave, y ye que trates por igual a les víctimes qu'a los verdugos. Y lo que tuvieron que facer les víctimes foi callar. Bono, pos eso ye mui cuestionable dendé'l puntu de vista éticu. En tou casu, esi pactu de silenciu yá prescribió porque pasaron trenta años y hai xeneraciones nueves que yá nun tán hipotecaes pol mieu al ruíu de los sables nos cuarteles. Y amás quieren saber. Esto ye imparable, faigas la llei que faigas. De fechu, esta llei nun empieza esti procesu: siguiólu. Los escaparates de les llibreríes, dende la década de los 90, foron llenándose de volúmenes que toquen esta materia, porque tamos descubriendo un mundu nuevu. Y eso los políticos nun lo pueden parar.

-¿Existe la necesidá d'enfrentar dende grupos como «todoslosnombres» o Frente Norte, por poner un exemplu, la revisión de la historia que se ta faciendo dende otros sectores venceyaos a la derecha?

-Yo formo parte d'un equipu de trabáyu que presentó na Universidá d'Uviéu unos resultaos sobre la relación de víctimes de la Guerra Civil. Yo creo qu'esi tipu de proyectos son importantes porque les cifres son importantes. Fai falta contar los muertos, sobre too porque'l franquismu inmediatamente depués de la guerra, como ganadores, inventariaron a tolos sos muertos y amás esculpiéronlos en mármol nes fachaes de les ilesies pa que nun nos olvidáremos. La otra represión conocíemosla insuficientemente: por eso ye importante establecer los fechos.

Otramiente, hai una vuelta de la versión franquista de la Guerra Civil al traviés de xente como Pío Moa y César Vidal. La so interpretación de la República, del 34 y de la guerra, sustancialmente nun tien nada nuevo: ye la mesma «Historia de la cruzada española» de Joaquín Arrarás nos años 40, dalgo modernizada por Ricardo de la Cierva nos 60. Quiciás Javier Esparza sía un poco más sofisticáu, pero ye poco menos simple. Pa empezar, habría que dicir que nun habemos falar de memoria histótica, sinón memories históriques. Y evidentemente los que tuvieron nel llau franquista, o los que se sienten heriedes d'ellos, tienen una memoria mui distinta del nuestru pasáu. Yo creo qu'hai qu'entrar nesi debate y contrarrestar eso, apoyándolo con datos y con pruebes incontestables. Non lo que fain Pío Moa y sobre too César Vidal, actuando como propagandistes y diciendo les coses de manera contundente pa los sos partidarios de tal manera que, a base de repitiles muncho, parezan verdá. Nós habemos acreditar seriamente que les coses foron d'otra manera, ensin maniqueísmos.

-Nel mes de xunetu va poner un cursu de branu en Llaviana sobre la cultura minera. ¿Facía falta reivindicar el mundu que desaparez?

-L'Asturies minera ta desapareciendo: si HUNOSA tien menos de 3.000 mineros y la minería privada tien mil o mil y picu obreros, esto evidentemente ta nel últimes. HUNOSA sola llegó a representar el 10% del empléu d'Asturies y agora ta nel 0,6%. Pero, pa los que miramos hacia atrás, tola Asturies contemporánea nun se puede explicar ensin tener en cuenta'l carbón. El carbón explica por qué hubo industria; por qué'l movimientu obreru, les organizaciones sindicales y polítiques foron la columna vertebral d'esta tierra. Explica la cultura popular, les pautes de conducta, los valores... Agora, depués d'estudiar lo organizativo, toi interesándome por aspectos que s'escapen más hacia la cultura del trabayu -colos valores y los comportamientos que xeneren los mineros como colectivu-, y per otra parte pola cultura d'élites que s'allega a esi fenómenu: a esa potencia que tienen los mineros como motivu temáticu.

Siempre comento que de los trabayos relacionaos cola industrialización ye mui dificil atopar canciones: a los siderúrxicos nunyos canta naide, mentes que sobre los mineros hai cientos de canciones que van de lo más clásico de la tonada asturiana a los hiphoperos. Otro tanto pasa cola lliteratura y col cine: hai más cine fechu n'Asturies y n'España sobre mineros nel sieglu XXI que nel sieglu XX. Lo que pasa ye que cola mina ta perdiéndose muncho más que'l carbón.

-Terminamos: L'olvidu llenu de memoria entós.

-Por supuesto. Y tamién viceversa: la memoria ta llena d'olvidu, por exemplu, cuando construimos el relatu canónicu de la transición o del franquismu. Pero, con too y con ello, el procesu de recordar o nun lo facer ye mui complexu y, davezu, cuando menos lo esperamos, viénennos a la cabeza alcordances coles que nun contábemos. Ésti ye un fenómenu condicionable pero nunca ye gobernable. Y eso ye lo que ta pasando anguaño cola memoria de la Guerra Civil y de la represión n'Asturies y n'España. Nesi sen, y hai que dicir que por suerte, los gobernantes son muncho menos poderosos de lo que quixeren.

Patrocina: Consejería de Cultura, Comunicación Social y Turismo. Obra Social y Cultural CajAstur. Fundación Rosa Luxemburgo.
 
Colabora: Ayuntamiento de lena. Ayuntamiento de Mieres. Ayuntamiento de Langreo. Ayuntamiento de Oviedo. Ayuntamiento de Avilés. Ayuntamiento de Cangas de Narcea. Ayuntamiento de Gijón. Red de Archivos de CC.OO. Fundación 1º de Mayo.
© Fundación Juan Muñiz Zapico