Miles de persones recordaron al históricu cabezaleru del nuestru sindicatu nel homenax entamáu pola fundación que lleva'l so nome, el día 4 de xineru nel cementeriu de La Frecha

Trenta años depués del multitudinariu entierru del históricu cabezaleru de CC.OO. Juan Muñiz Zapico, otru gran xentíu volvió axuntase'l día 4 de xineru nel cementeriu de La Frecha en L.lena, pa brinda-y homenax y facer acordanza de los valores qu'él defendió. Francisco Prado Alberdi, presidente de la fundación que lleva'l so nome, fixo de maestru de ceremonia nun actu institucional que cuntó coles intervenciones d'Higinia Torre Patallo y Marcos Muñiz, Vicente Álvarez Areces, Hugo Morán, Noemí Martín, Salvador Bangueses y Antonio Pino.

La viuda de Juanín volvió trenta años atrás, cuando "lu despidimos equí". Higinia Torre Patallo emocionóse al dicir que "el so exemplu sigue vivu, como bien amuesa esti actu". Tomó llueu la palabra'l so fíu pa, en primer llugar, facer reconocencia a los sos güelos, enterraos xunto a so padre, y tamién pa tolos que, nun segundu planu, tuvieron detrás de tantos homes y muyeres pasando amargures y represión, esplicó Marcos Muñiz. "Xente arrogante y sencillo, con un sentíu descomanáu de la dignidá y la llucha".

El presidente del Principáu tuvo palabres d'emponderamientu pa Juanín, l'home, pero tamién pa "una trayeutoria de llucha pola llibertá y la democracia". Por eso, amestó Vicente Álvarez Areces, "nun va a desapaecer nunca". Sobre manera porque "los valores qu'él facía alitar siguen ayudándonos a avanzar". Pela so parte, l'alcalde de L.lena afirmó que Juan Muñiz Zapico yera "una d'eses persones poles que merez la pena siguir recordando". Y la nuestra obligación, amestó Hugo Morán, "ye nun lu defraudar".

Darréu intervieno la secretaria xeneral del PCA, pa emponderar a un "comunista y sindicalista exemplar", y facer acordanza d'aquel día cuando "con ocho años nun sabía quién yera Juanín, pero decatéme bien de la gran tristura cuando- yos dieron a los mios padres l'anuncia de la so muerte". Noemí Martín añadió: "El meyor homenax ye recoyer esi testigu y siguir lluchando polo qu'ellos llucharon".

El responsable de Política Institucional de la Confederación Sindical disculpóse en nome de Fidalgo, que nun pudo tar nel actu, enantes d'afitar que "Juanín representa la llucha, la xenerosidá y la esperanza". Salvador Bangueses rescampló la so capacidá pa "aconceyase con toos aquellos colos que facía falta facelo", col envís d'algamar llibertá, democracia, "daqué de lo qu'él nun pudo disfrutar". Pa lo cabero, el secretariu xeneral de CC.OO. d'Asturies afalagó'l sentíu de la unidá de Juanín y el so respetu pola pluralidá, reconociendo qu'ensin l'encontu de Comisiones Obreres la naciente democracia nun tendría sío vidable. "La razón cimera que-y da sen a esti actu ye la proyeición de los sos valores, humildá, solidaridá, espíritu unitariu...", valores "que faen falta agora y siempre", concluyó Antonio Pino.

Broche de Nuberu
Con retranca mui fina Chus Pedro alvirtió que "siguimos cantando nuna llingua que nun esiste", enantes de que Nuberu interpretare "Al home de la unidá", la yá mítica canción que Manuel Asur escribió como homenax a Juan Muñiz Zapico. Fue'l meyor pieslle posible a una xornada que ta yá nos anales del nuestru sindicatu.

Esposición y documental
Llueu del actu de La Frecha fueron munches les persones que s'averaron hasta la Ca la Música de Mieres, apicalbando'l salón d'actos onde se proyeutó'l documental "La Transición n'Asturies". Nel hall principal del edificiu tamién pudo visitase la esposición sobre Juan Muñiz Zapico, montada por alumnos de la Fundación pa la Formación y l'Empléu (FOREM) del nuestru sindicatu n'Asturies, y que primeramente tuviere asitiada na Casa de Cultura de La Pola (L.lena), a la que correspuende la semeya.