La Fundación Juan Muñiz Zapico recuerda con una exposición al históricu sindicalista asturianu del PC nel aniversariu de la so muerte

V. Gutiérrez

	Homenaxe a Juan Muñiz Zapico «Juanín».

Creía na democracia pero nun llegó a vela cuayar por un desgraciáu accidente de tráficu qu'esnucó la so conciencia obrera'1 4 de xineru de 1977. Al otru día, más de venti mil persones lloraben la muerte de Juan Muñiz Zapico «Juanín» nel cementeriu La Frecha, onde nació, cerquina de La Pola Llena, pero inda munchos más trabayadores agradeceríen col tiempu l'esfuerzu nel qu'echó la vida pola reivindicación de los sos derechos fundamentales como clas.

En malapenes trenta y cinco años que duró'l so camín, desviáu inesperadamente nuna traicionera curva de les revueltes d'El Güerna, Muñiz Zapico tuvo siete años presu, axuntó cinco despidos, careció cuatro multes gubernatives, dos condenes del Tribunal d'Orde Públicu y pasó per cuatro fuelgues de fame. Asina, «Juanín» yera conocíu y estimáu pola so capacidá d'análisis, fomentada por una fonda y variada formación autodidacta, asina como pola so intención constante de diálogu, llevada por una visión unitaria de la clas obrera.

Yera lo propio, entós, que, cuando en 1990 CC 00 d'Asturies decidía fundar una entidá ensin ánimu de lucru cola intención de guardar la memoria del movimientu obreru, al traviés d'investigaciones, publicaciones, exposiciones y actividaes, esta fundación llevare'l so nome. Y ye lo suyo que, agora que se cumplen trenta años de la desaparición del históricu cabezaleru, la organización sindical d'esquierdes remembre la figura de quien, n'abril de 1976, vía fundamental pal futuru d'España l'entendimientu de que «los intereses del Estáu Español son los intereses de los pueblos que lu componen y non sólo de la oligarquía».

D'esta manera, en recuerdu d'esa clarivicencia, del so compromisu y los sos sacrificios en pos de los derechos de los trabayadores, la Casa la Cultura de La Pola Llena, va inaugurar el próximu llunes 18 d'avientu, a les siete la tarde, una exposición na memoria de Juan Muñiz Zapico, conocíu como «Juanín», qu'a lo llargo del añu que vien tamién va recorrer dalgunos centros de Mieres, La Felguera, Uviéu, Avilés, Cangas del Narcea y Xixón. Amás, el 4 de xineru, coincidiendo col so aniversariu, el cementerio de La Frecha va acoyer a les doce la mañana un actu institucional col que se va remembrar a Juan Muñiz Zapico. Y una hora más tarde, el Salón d'Actos de la Casa de la Música de Mieres va sumase al recuerdu del líder del movimientu obreru cola proyección del documental «La transición en Asturias».

L'home de la unidá

Protagonista del desarrollu de les Comisiones Obreres, Muñiz Zapico formó parte del Secretariáu Xeneral de l'Asamblea de Barcelona, onde espunxo una conferencia sobre'l Reforzamientu Orgánicu de Comisiones, participando tamién nel Comité Central del PCE celebráu en Roma nel añu 1976 y na Coordinación DemoGráfica d'Asturies.

«Obreru de la esperanza» y «llabrador de llibertaes», como lu cantó Nuberu sobre una lletra compuesta a la so muerte pol poeta Manuel Asur, foi ún de los diez encausaos nel famosu «Procesu 1001», el mayor xuiciu al sindicalismu español que se celebró nun ambiente encaldiáu pol asesinatu de Carrera Blanco. Dieciocho años de cárcel, reducíos a cuatro pola gran repercusión social que tuvo la pena, y que terminaron en 1975 con un indultu real que «Juanín» non consideró xustu pola presencia y detención d'otros presos políticos, y pola necesidá d'amnistía que demandaba'l momentu. «La mio actitú non cambia respective a la que tenía cuando entré en prisión. Los problemes d'entós siguen pendientes. Mientres nun haiga auténtica llibertá de reunión, asociación y expresión; mientres los derechos de la persona nun sían reconocíos, la mio postura nun va variar>. Juan Marcos Muñiz Zapico, apodáu cariñosamente «Juanín» pa la historia, foi un lluchador incansable. Conocer la so figura y reconocela ye imprescindible na Asturies d'anguaño. «L'home de la unidá» sigue, trenta años más tarde, poniendo l'exemplu.