otras actividades »

Seminariu
LLINGUA, CLASE Y SOCIEDÁ

Universidá d'Uviéu, 2006
   » Programa, información..., 27 - 30 de marzu del 2006

 
Seminariu
LLINGUA, CLASE Y SOCIEDÁ

Universidá d'Uviéu, 2006
 
Prensa

01/03/2006 - asturnews.com
Preséntase n'Uviéu el seminariu sobre llingua, clase y sociedá

21/03/2006 - El Comercio Digital
Una regaya de lluz

28/03/2006 - asturies.com
Representantes de los principales sindicatos d'educación afirmen que nun tienen comunicación con Riopedre pa falar sobre l'asturianu

28/03/2006 - asturies.com
Llope y de la Cera espunxeron los sos estremaos puntos de vista sobre izquierda y derechos llingüísticos n'Asturies

29/03/2006 - asturies.com
Faustino Zapico sorrayó'l papel de los historiadores del XIX nel procesu español de nacionalización

29/03/2006 - asturies.com
Xulio Viejo venceyó la esistencia d'un rexistru llingüísticu dominante cola d'una clase social que lu xenera

30/03/2006 - asturies.com
Rafael Valdés y Pablo San Martín xorrascaron na rellación de les ideoloxíes d'enantes de la Guerra col asturianu

30/03/2006 - asturies.com
"La lliteratura burguesa despreciaba'l chigre por ser un espaciu de sociabilidá obrera"

31/03/2006 - asturies.com
Prado Alberdi afirmó qu'a l'autonomía d'Asturies "pasáron-y la segadora en Madrid"

31/03/2006 - asturies.com
Les xornaes "llingua, clase y sociedá" remataron espeyando les rellaciones ente movimientu obreru y llingua en Cataluña, Euskadi y Galicia

09/04/2006 - Les Noticies
Llingua, clas y sociedá na Universidá

 




 
Preséntase n'Uviéu el seminariu sobre llingua, clase y sociedá
asturnews.com, 01/03/2006

Les xornaes van celebrase del 27 al 30 de marzu na facultá de Xeografía y Hestoria con participación d'especialistes de delles universidaes

Redacción

Les xornaes "Llingua, clase y sociedá" qu'organiza'l Seminariu d'Historia Contemporánea de la Universidá d'Uviéu preséntense esti miércoles 1 nel Club Prensa Asturiana cola presencia de los coordinadores del congresu, Rubén Vega y Xulio Viejo. El seminariu va celebrase del 27 al 30 de marzu na Facultá de Xeografía y Hestoria con participación d'especialistes provenientes de diverses universidaes.

Les xornaes van centrase en debatir les relaciones hestóriques y de calter sociollingüísticu ente'l movimientu obreru y la izquierda asturiana respective a la realidá cultural propia del país. El tratamientu dau pol pensamientu marxista a la diversidá nacional y llingüística, los movimientos del poder nel estáu español tocante al centru y la periferia o el bagaxe ideolóxicu del asturianismu son otros de los asuntos que van tratase nes xornaes, xunto a la visión de realidaes nacionales prósimes como les de Galicia o el País Vascu.

La cuota d’inscripción pal seminariu ye de 30 euros y ha facese una tresferencia nel númberu de cuenta 2048 0077 5 2 034003587 de caxAstur, Teatinos-Uviéu, faciendo constar la referencia “Seminariu Llingua, clase y sociedá”. Ha unviase’l resguardu bancariu d’ingresu a la Secretaría del Seminariu antes del 24 de marzu del 2006, axuntando col boletín d’inscripción, la fotocopia’l DNI. Les señes de la Secretaría del Seminariu “Llingua, clase y sociedá” son : Seminariu d’Historia Contemporánea, Facultá d’Historia y Xeografía , Universidá d’Uviéu, c/Teniente Alfonso Martínez, s/n, 33011 Uviéu.

 




 
Una regaya de lluz
El Comercio Digital, 21/03/2006

PABLO ANTÓN MARÍN ESTRADA

Dientro d’unos díes nel Campus del Milán va celebrase un seminariu tituláu ‘Llingua, clase y sociedá’. Especialistes asturianos y de diverses universidaes del Estáu van xuntase a debatir alrodiu d’una d’eses cuentes pendientes que l’ideariu progresista sigue teniendo colos oriellaos de la Historia, xente invisible nel relatu oficial del camín al través del tiempu de les comunidaes sociales.

El pasáu sieglu XX remaneció de les sombres y el silenciu a les muyeres (nada menos que la mitá del xéneru humanu), a les mal llamaes minoríes discriminaes por motivu de color de piel, orixen, opciones sexuales. Millones de seres humanos que permanecieran dende la nueche de los tiempos reducíos a la invisibilidá, a la non esistencia oficial o a la esistencia ensin nengún tipu de derechos. La so remanecencia fue’l gran progresu d’un sieglu bayurosu n’atrocidaes y sangrientes llocures colectives.

Anguaño nenguna conciencia progresista nin conservadora sería a poner en tela de xuiciu la universalización de los derechos humanos a tolos seres d’esa condición, sociedaes, colectivos, pueblos. De vez en cuando hai inda quien tenta facelo dende’l fanatismu relixosu o moral, mesmo instituciones tan aparentemente respetables como partíos políticos, iglesias, medios de comunicación dan blincos hacia atrás, hacia la nueche. Los amigos de la foguera tán ende y siempre van tar acusbiando, anque’l mundu xire y les mentalidaes llimpien de prexuicios.

La negación de los derechos por razón de llingua sigue siendo una realidá n’estaos aparentemente modélicos en llibertaes democrátiques como l’español. Equí, ensin dir más llonxe, en casa, la consideración que merecen la llingua asturiana y los sos falantes a la mayoría de los políticos con responsabilidá y a bien de creadores d’opinión social, ye una preba de lo muncho que nos queda por andar. Nel más benévolu de los casos, la mesma esistencia d’una llingua como l’asturianu ye un problema, un enguedeyu, dalgo fastidioso d’afrontar.

Basta ver el xestu torcíu del gobernante cuando tien d’opinar en públicu del asuntu llingüísticu o la tentación, casi siempre irresistible, del informador en tirar del filón polemista, como prebes de que la nuestra comunidá ye, como en tantos otros asuntos, una isla d’escuridá y reveníu conservadurismu.

Presta saber qu’hai regayes de lluz que s’abren y xente como esos entamadotes del congresu ‘Llingua, clase y sociedá’, amigos de preguntar qué pasa equí y por qué la nueche. Too eso de lo que nun quier nin oyer falar l’Asturies oficial.

 




 
NEL ENTAMU DE LES XORNAES "LLINGUA, CLASE Y SOCIEDÁ"
Representantes de los principales sindicatos d'educación afirmen que nun tienen comunicación con Riopedre pa falar sobre l'asturianu
asturies.com, 28/03/2006

Redacción

Entamó ayeri n'Uviéu la primer xornada del seminariu "Llingua, Clase y Sociedá" alcuentru de filólogos y historiadores que va analizar el papel qu'ocupaben los idiomes nes rellaciones sociales a lo llargo del sieglu XX nel Estáu español. Tres de les presentaciones, que corrieron a cargu del decanu de la Facultá d'Historia Octavio Montserrat, el profesor de filoloxía Xulio Viejo faló de lo novedoso de la iniciativa qu'intenta xunir los estudios de clase d'historiadores y los llingüísticos de los filólogos, xuniendo dos elementos mui presentes na historia d'Asturies como son el movimientu obreru y la llingua, y llamó l'atención de que nesti casu la iniciativa del seminariu, contrariamente a lo que suel pasar, saliere de los estudiantes, concretamente de Rafael Rodríguez Valdés, que foi l'impulsor de la idea. Otru de los responsables de la organización de les xornaes, Rubén Vega, destacó l'enfoque interdisciplinar del seminariu y el que fale d'un tema mui relevante y presente na sociedá pero que desgraciadamente da llugar a xuicios y opiniones mui rotundes basaos en prexuicios, cuando la realidá de les rellaciones ente llingua, clase y sociedá son muncho mas complexes.

Darréu entamó la primer mesa redonda. Centrada na cuestión del "Sindicalismu y enseñu del asturianu" nella participaron representantes de los trés sindicatos con más presencia na enseñanza asturiana, con Primitivo Abella (CC.OO.), Maximina Fernández (FETE -UXT) y Alberto Megido (SUATEA). La representante d'UXT fizo un repasu a los últimos 30 años del asturianu na educación, recordando dellos fitos importantes como l'apaición del famosu lema "bable nes escueles", la fundación de l'ALLA, la introducción del asturianu nos centros pilotu nel cursu 84-85 asina como'l sofitu de la UXT a la cooficialidá.

El representante de SUATEA, pela so parte, recordó que dende l'entamu del so sindicatu hai 25 años ya ta conseñada la demanda d'oficialidá nos sos estatutos fundacionales y recordó la necesidá de la creación de la especialidá de llingua asturiana, que calificó de "problema esclusivamente políticu", y que, mientres na enseñanza primaria les coses van meyorando, en secundaria e infantil la enseñanza del asturianu ye mínima o inesistente. Punxo'l casu del cursu d'infantil del IES Severo Ochoa en Xixón, onde'l 90% de los alumnos pidieron asturianu pero onde la conseyería nun mando al profesor, como tendría obligación, según el sindicalista, que tamién contó delles anécdotes personales de cuando entamó a poner clase a primeros de los 90. Alberto Megido recordó que los profesores de llingua taben daquella bastante mal consideraos nos mesmos centros, asegurando que se daben naquellos años situaciones en que los compañeros-y negaben el saludu.

Pela parte de CCOO, Primitivo Abella centró la so intervención en sorrayar como los centros concertaos y privaos faen de menos l'enseñu del asturianu, siendo que namás trés en tol país ufierten asturianu. Los ratios mínimos de 8 alumnos y de 15 en bachiller pa poder solicitar asturianu tamién merecieron la crítica de Primitivo Abella, que reconoció que l'usu del asturianu como llingua vehicular ye "otra asignatura pendiente".

Los trés representantes reclamaron la creación de la especialidá d'asturianu y afirmaron que-y tienen pidío al conseyeru Riopedre una reunión pa tratar esti tema. Sicasí, les rellaciones col responsable d'educación tan lloñe de ser normales, como reconocieron los sindicalistes. Los trés aseguraron que Riopedre lleva mas de dos años ensin recibilos, llegando a dase'l casu de que les reclamaciones de los sindicatos d'enseñanza sobre l'asturianu tienen que pasase a l'Academia de la Llingua pa qu'esta y-les apurra al conseyeru nes ocasiones qu'aconceyen los dos organismos.

 




 
LES XORNAES "LLINGUA, CLASE Y SOCIEDÁ" FALARON SOBRE IZQUIERDA Y DERECHOS LLINGÜÍSTICOS
Llope y de la Cera espunxeron los sos estremaos puntos de vista sobre izquierda y derechos llingüísticos n'Asturies
asturies.com, 28/03/2006

Redacción

El seminariu "Llingua, Clase y Sociedá" tuvo na segunda mesa que se celebró ayeri baxo'l títulu "izquierda y derechos llingüísticos" un cruce d'opiniones opuestes nes llectures que ficieron Manuel Fernández de la Cera, ex-conseyeru nel gobiernu de Pedro de Silva y el portavoz d'Izquierda Asturiana Inaciu Llope.

De la Cera, que fizo toles sos intervenciones n'asturianu occidental fizo una llectura en positivo na que sorrayó "aciertos" como "la creación de premios lliterarios y los avances na toponimia asina como nel folklore", y emponderó'l fechu que "güei escríbese muncho meyor que nos tiempos de Conceyu Bable". De la Cera fizo alcordanza de la so etapa al frente de la conseyería de Cultura, un tiempu "en que mandábemos cartes a los padres pa que matricularen a los sos fíos en clase d'asturianu" y dixo que "la especialidá de Filoloxía Asturiana ye fundamental" pal futuru del idioma.

El segundu ponente de la sesión, Inaciu Llope, preguntóse si yera necesario de "falar d'izquierda y derechos llingüísticos, en cuantes que se supón que "la izquierda tien de reconocer tolos derechos, incluyios los llingüísticos" pa concluyir que "Desgraciadamente hai que falar d'ello porque una parte de la izquierda asumió'l discursu burgués sobre les minoríes". Yendo al títulu de les xornaes, Llope recordó que "l'asturianu siempre foi un marcador de clase, por cuanto'l so usu yera mayoritariu nes clases populares" y declaró que "El pecáu orixinal de la izquierda española foi interpretar lo identitario como un problema" y que n'Asturies esa izquierda "considera'l fechu de que se fale asturianu como una desgracia" polo que pal ponente "esa izquierda busca la desapaición del asturianu con un mínimu coste políticu".

La segunda intervención de Fernandez de la Cera centróse nel fechu de que la burguesía asturiana nes villes "falaba asturianu pero tenia mala conciencia por ello". L'ex - conseyeru recordó la llei del asturianu que quixo impulsar el gobiernu de Pedro de Silva y dixo que daquella "el sector retrógadu del PSOE y la mesma ALLA" refugáronla por razones distintes. De la Cera evitó pronunciase sobre la oficialidá y sobre la posición del PSOE al respeutive, señalando namás que que "si la demanda d'asturianu qu'hai en primaria la hubiere en secundaria y bachiller ya habría oficialidá".

Inaciu Llope fizo una llectura final mui dura de valoración na qu'aseguró que "nun hebo una sola midida tomada nestos 30 años que garantice'l futuru del asturianu" añadiendo que la FSA "miente cuando venceya oficialidá y obligatoriedá" y qu'esta ye "una midida indispensable anque non suficiente pal futuru del idioma".

 




 
XORNAES "LLINGUA, CLASE Y SOCIEDÁ"
Faustino Zapico sorrayó'l papel de los historiadores del XIX nel procesu español de nacionalización
asturies.com, 29/03/2006

Redacción

Les xornaes "llingua, clase y sociedá" vivieron ayeri la so segunda xornada, na que'l profesor d'historia Francisco Erice abordó'l tema de "llingua y sociedá nos clásicos marxistes: les sos aportaciones a la lluz de la sociollingüística actual". Nuna tarde protagonizada por elli y pol tamién historiador Faustino Zapico, l'autor de "La Burguesía industrial asturiana" reconoció que'l marxismu nun contribuyó especialmente a la teorización sobre'l llinguaxe, a lo menos no que se refier a los clásicos del pensamientu materialista, señalando que "nun hai reflexón llingüística na obra de Marx y Engels de forma pormenorizada porque nel tiempu en que desarrollaron el so pensamientu la llingüística nun yera una disciplina avanzada al tar nun estadiu mui poco desarrolláu y amás nun-yos abultaba que fuere fundamental como tema políticu".

Nun repasu a los clásicos del marxismu, Francisco Erice analizo les idees que sobre llingüística, rellaciones ente clase social y llingua y llingua y poder realizaron Marx y Engels, asina como dellos pensadores marxistes nel periodu del la II internacional, onde la llamada cuestión nacional garró un protagonismu especial. Nel repasu d'Erice Sebares apaecieron les teorizaciones sobre estes idees de Rosa Luxemburgo, Karl Kautsky, Connolly, la escuela austromarxista y los bolchequeviques, pero Erice detúvose en dos figures del marxismu que tamién relfexonaron en mayor o menor midida sobre'l fechu llingüísticu. D'una parte Stalin, que participó nes polémiques ente les distintes escueles filolóxiques soviétiques y d'otra l'italianu Gramsci, qu'analizó les implicaciones metallingüístiques del propiu llinguaxe. Erice afirmo qu'anque "el marxismu tien llagunes en cuantes a la reflexón sobre'l llinguaxe y tamién no referente a la cuestión nacional, delles reflexones de los clásicos marxistes tienen cierta vixencia n'actualidá". Una actualidá que quixo tocar el ponente al recordar la vinculación ente llingua y identidá cuando afirmó que "tolos procesos d'oficialización de les llingües, tanto de les estatales como les minoritaries, tienen una dimensión política y promueven un proyectu identitariu".

El piesllu a esti segundu día del seminariu echólu l'historiador Faustino Zapico, que faló de "la concrección n'Asturies del estáu lliberal español y les sos alternatives (1808-1898)". Zapico dio un repasu a la forma na que cuayó n'Asturies l'estáu nacional decimonónicu por parte del lliberalismu y les alternatives qu'a esi modelu surdieron dende la mesma Asturies, que Zapico resumió na corriente del republicanismu federal y la del carlismu. Unes alternatives qu'anque discrepaben na forma, nun lo facíen nel fondu "porque enxamás punxeron en cuestión l'estáu-nación como tal". Na so descripción de los mecanismos emplegaos poles élites polítiques lliberales pa dir conformando l'estáu nacional español a partir de la constitución de 1812, Zapico faló del procesu de creación de símbolos nacionales como la bandera o l'himnu y sobremanera d'unos mecanismos nacionalizadores tales como l'exércitu o la escuela, alvirtiendo que "dambos tuvieron series deficiencies nesa llabor". Mas eficaz nesi llabor uniformizador foi según Zapico la creación d'una historiografía nacionalista española, "qu'aneció na idea d'Asturies como orixe d'España no que se denomina covadonguismu". Asinamesmo esaminó delles propuestes y discursos tanto del autonomismu premodernu representáu pol carlismu como'l "modernu representáu pol republicanismu federal". Nesti sentíu rescampló la mención que fexo a una propuesta d'autonomía p'Asturies ellaborada en 1897 pol partíu republicanu federal y na que s'incluyía "la plena soberanía fiscal" al empar que llamó l'atención sobre la "desconexón que se dio ente l'asturianismu cultural de la época coles corrientes autonomistes, tanto les federales republicanes como les fueristes del carlismu".

 




 
XORNAES "LLINGUA, CLASE Y SOCIEDÁ"
Xulio Viejo venceyó la esistencia d'un rexistru llingüísticu dominante cola d'una clase social que lu xenera
asturies.com, 29/03/2006

Redacción

El filólogu Xulio Viejo abrió ayeri la segunda xornada del seminariu "llingua, clase y sociedá" que se desarrolla nel Campus d'Humanidaes de la Universidá d'Uviéu. Baxo'l títulu "El llinguaxe humanu: de la evolución natural al discursu social" el profesor de la universidá d'Uviéu abordó les característiques básiques del llinguaxe humanu, faciendo una puesta al día de la evolución del mesmu, amás de tratar los discursos que tan presentes na sociedá alredor del fechu llingüísticu, sobremanera no que se refier a la dimensíon social del usu llingüísticu y los discursos ideolóxicos derivaos d'elli.

Señaló que les llingües "nun determinen la visión del mundu" y recalcó "la igual dignidá de toles llingües frente a los prexuicios qu'espresen una supuesta desigualdá de los idiomes". Asinamesmo, Viejo llamó l'atención sobre'l fechu que "hasta'l 90% de les llingües falaes anguaño puen desapaecer a lo llargo del sieglu XXI". No tocante a la vinculación ente llingua y clase social, el profesor de la Universidá d'Uviéu recordó como les normes estandar de les llingües históriques "son productu d'un rexistru venceyáu dafechu a les clases de prestixu" mientres que pa elli, no que cinca a les rellaciones ente idioma y identidá "la llingua nun crea necesariamente mas qu'una identidá, la llingüística".

La segunda de les esposiciones de la mañana, que corrió al cargu de la filóloga Noemí Gonzalez García abordó'l tema de "llingua y clase social". Tres d'un repasu breve a la historia de la sociollingüística como disciplina, Noemí González afondó na sociollingüística marxista, especialmente na soviética, analizando'l so desarrollu y derivaciones. Asinamesmo analizó la concepción de la llingua nel primer marxismu al traviés d'estremaos testos de Marx, Engels y Paul Lafarge xunto coles consideraciones que fexo Stalin sobre llingüística al intervenir directamente nos debates d'esta disciplina na URSS. No referente a les rellaciones ente llingua y clase social, la filóloga señaló como "el fechu de pertenecer a una clase social fai que los individuos empleguen un rexistru o otru, o nel so casu, llingües distintes en sociedaes plurillingües".

 




 
XORNAES, LLINGUA, CLASE Y SOCIEDÁ
Rafael Valdés y Pablo San Martín xorrascaron na rellación de les ideoloxíes d'enantes de la Guerra col asturianu
asturies.com, 30/03/2006

Redacción

La primera de les ponencies de la mañana d'ayeri dientro del alcuentru "llingua, clase y sociedá" tenía de tratar de mano sobre "La ideoloxía llingüística del movimientu obreru na Asturies d'entesieglos", pero l'historiador Rafael Rodríguez Valdés aparcó de mano'l tema central de la ponencia pa falar sobre'l papel qu'han tener la historia y los historiadores na sociedá, incidiendo na so función social y remarcando la necesidá d'afuxir de caxellos estancos nes diferentes estayes de la ciencia. Rodríguez Valdés refirióse a dos conceptos qu'emplegó a lo llargo de la so charra, diferentes pero interrellacionaos, como son la mentalidá y la ideoloxía. A partir d'estes primeres consideraciones, el ponente planteó la total validez de l'afirmación del perconocíu sociollingüista valencianu Rafael Ninyoles pola cual "les llingües nin lluchen nin choquen: son los grupos sociales los qu'entren nuna rellación cooperativa o antagónica" a lo qu'amestó que "nun se pue separtar la llingua de la realidá social y política de los sos falantes".

Rodríguez Valdés afirmó que "Les condiciones materiales influyen enforma nos prexuicios y estigmes llingüísticos" pa pasar darréu a analizar la presencia del asturianu y el so usu dientro del movimientu obreru n'Asturies d'entesieglos, conseñando la so escasa presencia nos medios escritos, anque citó, ente otros, el casu de la prensa socialista, onde la presencia de léxicu asturianu nes sos fueyes yera significativa, rescamplando'l fechu de que les palabres y espresiones n'asturianu "diben en cursiva", col sentíu diferenciador qu'esto lleva arreyao. L'historiador que más trabayáu tien el tema de la presencia del asturianu nes actividaes de la izquierda d'enantes de la Guerra Civil afirmó que "anque l'usu escritu del asturianu foi mui minoritariu, "hai constancia de bien de mítines que se dieron n'asturianu". L'escasu emplegu escritu del asturianu, según l'historiador, pue interpretase ente otres razones pola falta de competencia ente los grupos políticos por emplegar la llingua.

Na otra sesión de la mañana, el sociólogu Pablo San Martín abordó'l tema "modernidá, llingua y rexonalismu n'Asturies del primer terciu del sieglu XX". Una de les primeres cuestiones que destacó al respective'l sociólogu sierense ye que'l rexonalismu, mayor interesáu nel caltenimientu de la llingua "yera un fenómenu que s'inxertaba na corriente conservadora y que nunca llegó a conectar col movimientu obreru nin tener una perspectiva de clase". Anque'l nucleu central de la ponencia yera'l dedicáu al rexonalismu d'enantes de la Guerra Civil, el sociólogu fexo referencia tamién al asturianismu durante'l franquismu, particularmente a los "franquistes particularistes" del IDEA, por mor que "a lo llargo del'l franquismu caltúvose un ciertu asturianismu cultural qu'enllazaba col rexonalismu d'enantes de la Guerra, un asturianismu per otru llau plenamente inxertu nes coordenaes del réxime".

Centrándose nel tema de la so comunicación, San Martín repasó los proyectos mas relevantes que dende'l rexonalismu políticu (Junta Regionalista del Principado, Liga Pro- Asturias etc.) o l'asturianismu cultural (grupu La Quintana, Centro de Estudios Asturianos etc.) surdieron na Asturies de final del sieglu XIX y entamu del XX. Ente les característiques que citó d'esos proyectos, San Martín quixo destacar que "víen a la clase obrera como un de los elementos qu'acababen con una Asturies idealizada, una especie d'Arcadia rural que tenía como símbolu la llingua y que yera l'únicu espaciu onde esta cobraba sentíu", concluyendo que la so preocupación pol asturianu nun diba mas allá nel meyor de los casos de "querer dotalu d'una gramática y diccionariu, lo mesmo que d'una producción lliteraria mas bayurosa" o n'otros como "una realidá que diba desapaeciendo irremediablemente y que víen subordinada al castellanu"

 




 
XORNAES, LLINGUA, CLASE Y SOCIEDÁ
"La lliteratura burguesa despreciaba'l chigre por ser un espaciu de sociabilidá obrera"
asturies.com, 30/03/2006

Redacción

Luis Benito García Álvarez cola ponencia "El demonio rojo. La representación de los obreros en la lliteratura burguesa y fascista" abrió la sesión de la tarde d'ayeri miércoles dientro del alcuentru "llingua, clase y sociedá". Nella, l'autor abordó la imaxe lliteraria de la clase obrera tanto na lliteratura burguesa asturiana posterior a la Restauración, citando autores como Palacio Valdés, Clarín o Pérez d'Ayala, como na lliteratura facista española, que taría representada por escritores como Agustín de Foxá, José María Pemán, Dionisio Ridruejo, Giménez Caballero, Wenceslao Fernández Florez, Sánchez Mazas, Concha Espina o'l psiquiatra Vallejo Nájera. Respective a la primer destacó'l so "discursu antiobrerista y despectivu pa cola cultura popular obrera", venceyando casi siempre al obreru "col chigre y calificándolu de depraváu". La referencia constante al chigre nesta lliteratura y n'otres espresiones del pensamientu burgués de la época vendría dada, mas que por una preocupación pola salú del obreru, pola "so condición d'espaciu de llibertá y de sociabilidá de la clase obrera". Na otra parte d'estes visiones lliteraries asitiaríase la lliteratura fascista, que zapicaba ente la demonización absoluta del movimientu obreru y l'asunción d'una retórica revolucionaria y de xusticia social propia de los facismos cola qu'esperaben "atraer a les mases obreres" y apartalos de "la peste del marxismu".

Na última de les conferencies del día entitulada "O galego: unha lengua de maiorías reivindicada por minorías", la profesora de la universidade de Santiago Carme Hermida caracterizó la situación sociollingüística de la Galicia del sieglu XIX y analizó los principales fechos y idees del movimientu de recuperación llingüística gallegu conocíu como "rexurdimento". La profesora Hermida recordó como "el gallegu yera la llingua mayoritaria en Galicia nel sieglu XIX, siendo los castellanofalantes una minoría perteneciente a les clases instruyíes y fundamentalmente de medios urbanos". Refirióse la ponente al fracasáu movimientu provincialista de 1840 -antecesor del rexonalismu y que surdió como protesta a la nueva división provincial de Galicia- como l'iniciador del "rexurdimento", al ser la fonte d'una serie d'estudios y reflexones sobre lo que yera'l pueblu gallegu, la so historia y les sos característiques y particularidaes, ente les que destacaba la llingua. Carme Hermida llamó l'atención sobre' fechu de que "un fracasu non políticu como'l provincialismu foi lo que paradóxicamente entamó'l rexurdimento".

 




 
L'ANTIGUU DIRIXENTE DE CCOO Y EL PCE PARTICIPÓ NES XORNAES, LLINGUA, CLASE Y SOCIEDÁ
Prado Alberdi afirmó qu'a l'autonomía d'Asturies "pasáron-y la segadora en Madrid"
asturies.com, 31/03/2006

Redacción

El seminariu "Llingua, Clase y Sociedá" que se celebró a lo llargo d'esta selmana n'Uviéu echó'l piesllu ayeri con una interesantísima mesa redonda que baxo'l títulu "Asturianismu y movimientu obreru" contó cola participación de Lluis Xabel Álvarez (Fundador de Conceyu Bable) y Francisco Prado Alberdi (Dirixente de CC.OO. y del P.C.E. na Transición).

Abrió la mesa Lluis xabel Álvarez que quixo dar la so visión personal del asturianismu nos años de la transición al recordar como "l'autonomismu añeraba en Conceyu Bable, liderando l'actitú nacionalista nel país nesa época". L'académicu de la Llingua y profesor d'Estética de la Facultá de Filosofía calificó a Conceyu Bable como "una organización que nun yera obrerista, sinón pequeño burguesa radical, moviéndose siempre nos limites de lo permitío". Lluis Xabel nun duldó n'afirmar que les rellaciones de CB col movimientu obreru durante la transición foron fríes y qu'hebo "cierta incomprensión de les nuestres demandes" anque recordó qu'hebo persones venceyaes tanto al asturianismu como al movimientu obreru, como los que pertenecíen a "camaretá". Refiriéndose a los últimos trenta años, Lluis Xabel afirmó que "tolo qu'hai n'Asturies de nacionalismu fuera de la izquierda ye nacionalismu español" pa concluyir que "llevamos camín de ser un parque temáticu onde acabe habiendo una xaula con un bablista dientro a mou de recuerdu de lo que pudo ser y nun foi".

Darréu garró la palabra Francisco Prado Alberdi, que fexo un repasu pormenorizáu de delles cuestiones que cincaben al asturianismu y el movimientu obreru asturianu nos años de la transición. Alberdi recordó como "el rexonalismu pesaba bastante poco pa nosotros, porque había otres prioridaes. De toles formes a partir del 75-76 el tema del rexonalismu entamó a caltriar nel movimientu obreru, xugando Conceyu Bable un papel mui importante al llamanos l'atención sobre'l tema, lo mesmo que la revista Asturias Semanal, onde ente otres coses Juan Cueto plantego'l conceutu del rexonalismu de clase". Dende esi intre, Prado Alberdi reconoz qu'entamó a dase una mayor rellación ente los presupuestos ideolóxicos en que se movía CB y les fuerces polítiques d'izquierda, de manera qu'Alberdi recordó que "adoptamos esi conceptu al ser conscientes del fechu diferencial económicu, y emplegábemos términos como'l de colonialismu económicu, más entovía cuando sintíemos qu'había una incomprensión fuera d'Asturies pa colos nuesos problemes".

El dirixente sindical y comunista na transición reconoz que dende les sos files "llegamos a llamentar que nun hubiere una burguesía nacionalista n'Asturies al ver como n'otros sitios ayudaben estes al so territoriu".

Prado Alberdi comentó tamién que foron "los miembros del MCA los primeros que plantegaron la cuestión asturianista dientro de CC.OO" y fexo mención tamién al procesu autonómicu nel qu'elli mesmu participó activamente como ún de los representantes del PCA, remembrando como "na comisión d'ellaboración del anteproyectu d'estatutu agudizóse la toma de conciencia rexonalista nel Partíu Comunista al tener que tratar de temes concretos que cincaben a la vida rexonal". Sicasí, esti afondamientu nos caminos d'una toma de conciencia asturianista dende la izquierda tarazóse dafechu cuando nun determináu momentu se decidió abandonar el conceptu de "rexonalismu de clase" al considerar "que los problemes d'Asturies, o meyor dicho "El problema d'Asturies" yera "un problema del conxuntu de los asturianos".

Francisco Prado Alberdi mencionó como'l "PCA defendió l'accesu a l'autonomía pola llamada "via rápida", pero tamién como al empar "había mieu nel partíu a que, de dase'l casu, fracasare n'Asturies el referéndum, trámite obligatoriu d'optar per esa vía pa ratificar l'estatutu, polo que dimos marcha atrás". Alberdi afirmó que dende'l momentu en que s'optó pela vía lenta hebo, p'agravar la situación, "una rebaxa constante de conteníos dende'l borrador del anteproyectu, pasando pel testu del anteproyectu hasta la redacción definitiva del estatutu d'autonomía", una rebaxa de conteníos qu'Alberdi dixo que se debió principalmente a que "en Madrid pasóse la segadora". No respective al reconocimientu de la llingua asturiana na redacción del estatutu, l'ex-dirixente comunista espresó que "plantegar el tema de la llingua en términos mas ambiciosos de lo que se fexo no qu'anguaño ye l'artículu 4 dábanos mieu, y amas yera una reclamación mui minoritaria".

 




 
NA UNIVERSIDÁ D'UVIÉU
Les xornaes "llingua, clase y sociedá" remataron espeyando les rellaciones ente movimientu obreru y llingua en Cataluña, Euskadi y Galicia
asturies.com, 31/03/2006

Redacción

El Seminariu Llingua Clase y sociedá remató ayeri xueves con una ulitma xornada que sd'encargó d'abrir Victor Manuel Santidrián, de la Fundación 10 de marzo, cola ponencia "Lengua y movimiento obrero en Galicia". Nella, tres facer un breve repasu a dellos clasicos marxistas que sistematizaron el tema de les nacionalidaes, centrándose en Lenín y Stalin y la obra d'esti ultimu "El marxismo y la cuestión nacional", el conferenciante centróse na cuestión gallega, esaminando la consideración que'l tema llingüisticu suscitó nel movimientu obreru gallegu nel sieglu XX, especialmente no que se refier al Partíu Comunista, señalando que "hai pocos testos sobre la cuestión llingüística en Galicia del comunismu de los años 20 y 30".

Esti fechu diba cambiar abondo dempues de la guerra civil, cuando'l dirixente historicu del comunismu gallegu Santiago Álvarez asumió'l reconocimiento de la "dimensión nacional de Galicia y la necesidá de normalizar el gallegu y de la so cooficialidá". A esto habría añedese la militancia nel PCG de Xesus Alonso Montero, intelectual, defensor de la normalización de la llingua y autor d'un llibru que diba convertise nun clasicu, el "Informe dramatico de la lengua gallega". Finalmente, y respondiendo a una cuestión formulada dende'l publicu, Víctor Manuel Santidrián comentó que "Vicente Álvarez Areces desempeñó un papel fundamental nel antifranquismu gallegu" anque dixo desconocer "la so posición personal sobre'l gallegu, seguramente asumiría la de la organización na que militaba nos ultimos años del franquismu, esto ye la defensa de la cooficialidá que facía el Partiu Comunista en Galicia".

Darreu foi Antonio Rivera Blanco, de la Universidá del País Vascu el qu'intervino cola ponencia entitulada "El primer socialismo vasco y las culturas territoriales de su entorno". Nella, tres dibuxar el panorama socioeconómicu y demograficu (atendiendo especialmente a los fluxos migratorios) asina como'l procesu industrializador en Vizcaya y Guipúzcoa, l'autor esplicó cuala foi l'actitú del primer socialismu vascu (1886-1923) ente'l fechu llingüísticu, señalando como "inicialmente tanto la burguesía como los obreros optaron pol castellán frente al euskera". "Tres de la I guerra carlista necesitose una nueva forma de tar n'España y foi cuando se fundamentó'l discursu de lo vasco, que d'aquella entá nun se contradecía cola identidá española", afirmó l'historiador vascu, añadiendo que "ya a últimos del sieglu XIX taba afitáu un discursu hexemónicu de lo vasco, compartíu por toles tendencies ideoloxiques sacantes el socialismu. Yera una identidá localista, tradicionalista y relixosa. Diba ser el nacionalismu'l que-y diere coherencia finalmente y sistematizare esi discursu". Nun determinau puntu "el socialismu y el nacionalismu víense antitéticos per dambes partes, pero tamien se retroalimentaron". Finalmente Antonio Rivera concluyó que pal primer socialismu vascu "tolo vasco yera identificao como nacionalista, incluyío la llingua, que recibe continuos y durísimos ataques per parte de los socialistes", a pesar de que l'euskera si s'emplegó "d'una forma instrumental na propaganda y nos mítines de cara a esparder el discursu socialista ente la población euskaldun".

Ya pela tarde'l seminariu averose a otru de los países peninsulares, nesti casu Cataluña, cola ponencia de Pere Gabriel de la Universitat Autónoma de Barcelona que llevó por titutlu "Cultura democrática, lenguaje político y lengua en Cataluña. ss. XIX-XX". De mano'l profesor catalán describió unes llinies básiques de socioloxía histórica del catalán nel sieglu XIX y entamos del XX, afirmando que "el catalán falábase de forma mayoritaria y persistente en tol sieglu XIX, incluyia la burguesía urbana, a pesar de que la nacionalización por parte del estau lliberal español supunxo ente otres coses la introducción del castellán na alta burguesía catalana". De siguío Pere Gabriel centróse na visibilidá del catalán y los intentos d'afirmación pública d'esti, mencionando la reinaxença como un movimientu nun solo "del conservadurismu, al participar nelli tamien progresistes y republicanos" añadiendo que "la reinaxença negose aceptar la folklorización del catalán". Asinamesmo mencionó la rellación ente'l movimientu obreru catalán y los símbolos catalanes, destacando nesti aspectu "al republicanismu federal como xenerador d'una parte importante de la simboloxía catalana y que va exercer gran influencia nel anarquismu catalán a la hora de qu'esti ultimu asuma los símbolos de catalanidá, entamando pola llingua". Nesti sentíu recordó como "l'anarquismu tomó una actitú positiva hacia ciertos planteamientos del catalanismu por influencia de los republicanos federales". Finalmente espresó que pa la mases obreres "l'usu de la llingua yera un signu de catalanidá y de diferenciación social dientro de la propia clase obrera, ente'l proletariau autóctonu, que la usaba de forma casi esclusiva, y l'inmigrante".

 




 
Llingua, clas y sociedá na Universidá
Les Noticies, 09 de abril de 2006

Ente los díes 27 y 30 de marzu celebróse na Universidá d'Uviéu un seminariu sobre les relaciones ente la llingua, la clas y la sociedá nel que participaron importantes estudiosos del Estáu español. Esti seminariu interdisciplinar, el primeru que se fai d'estes característiques n'España, foi notable pola calidá d'idees.

Uviéu, Rafael R. Valdés

Xulio Viejo y Pablo San Martín, ponentes nel seminariu «LLingua y clas». Foto: Costa.
Del 27 al 30 de marzu desenrrollóse'l Seminariu «Llingua, clase y sociedá» na Universidá d'Uviéu. El so aquél nun yera otru qu'analizar la dimensión social d'ún de los elementos que caractericen al ser humanu: el llinguaxe. Con esi envís, y dende un planteamientu y funcionamientu interdisciplinares, xuntáronse n'Uviéu filólogos y historiadores pa discutir alredor d'esta cuestión. ¿Tábemos treslladando esmoliciones del presente al pasáu, díbemos falar d'ausencies, o trataríemos dalgo importante enforma?

El día 27 de marzu empecipiaba'l Semianriu con dos meses redondes d'actualidá dafechu. La priemra d'elles, «Sindicalismu y enseñu del asturianu», más allá de que los sindicalistes punxeran en conocencia del auditoiu'l so anecdotariu personal o la precaridña de la especialidá y del profesoráu de Llingua Asturiana, valió pa constatar l'ausencia de discursu nesos mesmos representantes sindicales; y la segunda, entitulada «izquierda y derechos llinguísticos», onde s'axuntaben Manuel Fernández de la Cera y Unaciu Llope, amosó que nin los asturianistes del PSOE son a reconocer los derechos de los asturianofalantes en cuantes qu0individuos. Si de la boce de Fernández de La Cera nun se sintió la palabra «derechu», Inaciu Llope indicaba que dende la esquierda históricamente foron reconociéndose tou tipo de derechos, y si los derechos llingüísticos nun yeren reconocíos equí yera por mor de los «pecaos orixinales» de la izquierda española n'Asturies, casu de la renuncia al empléu de lo identitario para facer entidá o de la falta d'un discursu global tocántenes a Asturies. Sicasí, l'auditoriu tuvo d'alcuerdu col presidente del Conseyu de Comunidades Asturianes de la que dixo que'«una persona ensin conciencia de las sos raíces suel ser un mercenariu».

Al otru día, el profesor Xulio Viejo facía una puesta al día del discursu llingüísticu dende un puntu de vista que podríemos denomar bioloxicista, planteando que'l lliguaxe humanu ye funcionalmente neutru y más una facultá instintiva qu'una convención cultural, cuestionando de la mesma'l papel de le llingües como una forma de ver el mundu y conseñando que'l modelu lligüísticu referencial suel ser el d'un determináu grupu social, «un constructu puramente simbólicu». tres d'elli, Noemí González dende un planu más descriptivu qu'analíticu, percorrió les relaciones ente llingua y clas, la historiografía sociollingüística de recién y los entamos de la sociollingüística marxista, parqndo sobremanera en textos de clásicos marxistes.

Na tarde del 28 primero tocóy la vez a Francisco Erice, que se centró nes contribuciones marxistes a la llingüística, que pa elli foron «escasamente relevantes» anque delles de les sos idees puedan incorporase a los debates d'anguaño. Conseñó la falta d'uniformidá y de reflexón concreta al respective, siendo'l respetu a les lligües autóctones mesmo que la diferenciación de funciones de los estremaos idiomes los elementos más compartíos ente les distintes tendencies. N'acabando'l profesor de la Universidá d'Uviéu, Faustino Zapico explicó'l procesu de constitución del estáu-nación español y les alternatives que se producen, que vinientes dende'l carlismu y el republicanismu federal, nun cuestionen la constitución d'esi estáu en sigo mesmu sinón el modelu defendíu pol lliberalismu doctrinariu español.

La mañana del 29 siguió dedicada a Asturies, y tres de la mio ponencia «Ente'l murciélago y l'esperteyu. Ente la ideolaxía y la mentalidá llingüístiques del movimientu obreru n'Asturies dentesieglos», Pablo San Martín analizó les concepciones lligüístiques del rexionalismu del primer terciu del sieglu XX, qu'aneciando n'idees yá expuestes n'anteriores trabayos de so (coles que nun toi d'alcuerdu) venceyó casiqué n'exclusiva con un movimientu conservador enforma.

Pela tarde, Benito García fixo un repás a la representación de los obreros na lliteratura burguesa y fascista, analizando la obra lliteraria dende una doble relación cola historia y cola ideoloxía de la historia. ASina les coses, na lliteratura castellana fecha n'Asturies demientres la restauración la clas obrera espéyase como «intemperante» y los chigres como «lugares de depravación y violencia», mentes que na lliteratura fascista, ferramienta p'afitar les estratexes de control y represión social de les fuerces y rexímenes fascistes, presentóse dende una visión maníquea al comunismu como'l culpable de tolos males del país. tres d'elli, la profesora de la Universidá de Santiago Carme Hermida fixo una caracterización sociollingüística de la Galicia del sieglu XIX mesmo que del ideariu del Rexurdimiento; no tocante al primer puntu, calificóla como una situación de minorización onde funcionen prexuicios llingüísticos, ideolóxicos y sociolóxicos, y no que fai al segundu, los oxetivos del Rexurdimiento sedríen facer del gallegu como idioma lliterariu y que la población alquiera concencia llingúística, siendo'l puntu d'inflexón el descubrimientu de la lliteratura gallega medieval. Sía como quier, más discutible ye la so idea de que la ideoloxía romántica nun ye dalgo fundamentalmente nesti movimientu.

Na mañana del 30 participaron Víctor Santidrián (Fundación 10 de Marzo) y Antonio Rivera (Universidá d'euskadi). El primeru introducióse nes postures lligüístiques del movimientu obreru en galicia (nes del Partíu Comunista sobremanera), qu'elli calificó de «defensa estatutaria» del gallegu nel marcu de la reconocencia de Galicia como nación o nacionalidá. Santidrián fixo un siguimientu dende los años 20 hasta'l 1978, onde'l gallegu pasó de ser un llingua malapenes empleada na prensa comunista a ser l'idioma vehicular, conseñando la importancia d'individualidades como Satiago Álvarez o Xesús Alonso Montero nos debates qu'esistieron al respective. El segundu, que llendó la so ponencia al primer socialismu vascu, introdució les variables del moedlu d'industrialización, del tipu d'inmigración y de los discursos identitarios. Pa Rivera la clave taría pa lo que fai a la imaxe del euskera como llingua reaccioanria, na existencia d'un discursu hexemónicu sobre la identidá vasca que va a ser retrucáu y cuestuonáu por partíu Socialista, en cuantes qu'entendíen que nun tenía otru sentíu que desplazar socialmente a los obreros y subordinalos no político y no económico. otres claves pa que l'euskera nun fuera nel mayor de los casos otro qu'una llingua empleada de xeitu instrumental pol socialismu vizcaín, ye la competencia (noción que yo tamién empleo pal casu asturianu) con otros sectores políticos (casu del nacionalismu aranista) y l'asumir el castellán como un idioma superior y «de cultura».